Պարտադիր ծառայության ժամկետները կրճատելու հայեցակարգով, գուցե, փորձում են Ադրբեջանի ապառազմականացման պահանջը կատարել. Աբրահամյան

12:48 4 Դեկտեմբեր 2024

ՀՀ վարչապետի պաշտոնը զբաղեցնող անձի հայտարարությունը, թե ինքը դեռևս փնտրտուքների մեջ է և չի հասկանում մեկ բանակի, երկու, թե երեք բանակների դեմ պետք է աշխատել, կամ՝ առհասարակ, ինչ խնդիր պետք է լուծել, ցույց է տալիս իշխանության, կառավարության բովանդակությունը կամ դրա բացակայությունը․ ԱԺ-ում լրագրողների հետ ճեպազրույցի ժամանակ հայտարարեց «Պատիվ ունեմ» խմբակցության պատգամավոր Տիգրան Աբրահամյանը։

«Սրա մասին նույնիսկ չի կարող խոսել մի մարդ, ով մեկ կամ երկու տարի է զբաղեցնում այդ պաշտոնը, բայց առավել ևս երբ մարդը 7 տարի զբաղեցնում է այդ պաշտոնը և դեռևս փնտրտուքների մեջ է, թե որն է մեր խնդիրը պաշտպանության կամ անվտանգության հարցում, իհարկե, արդեն իսկ ցույց է տալիս այն բովանդակությունը կամ դրա բացակայությունը, որը կա այս իշխանությունում և կառավարությունում»,-ասաց նա։

Ըստ Աբրահամյանի, այստեղից ևս կարելի է եզրահանգել, որ այս կառավարության ներկայացրած որևէ քաղաքական գիծ, որևէ ծրագիր, որը վերաբերում է ԶՈւ-ին որևէ ձևով քննարկան ենթակա չէ։

«Եվ նույնիսկ այն ծրագրերը, որ կարող են երկարաժամկետ կտրվածքով դրական էլեմենտներ պարունակել, այս համակարգային բարդակի մեջ նպատակներին, թիրախներին որևէ ձևով չեն հասնում»,-ասաց նա։

Անդրադառնալով ապառազմականացման Ադրբեջանի պահանջին՝ Աբրահամյանը հիշեցրեց, որ ԶՈւ-ի կերպափոխման հայեցակարգ է ընդունվել, որ սահմանում է, որ մինչև 2027թ.-ը պարտադիր զինվորական ծառայության ժամկետները կրճատվելու են։

«Այնտեղ նշվում էր արհեստավարժ բանակի ձևավորման մասին, և կառավարության ծրագրի մոտեցմամբ՝ իբրև մինչև 2027թ․ պետք է բերեն և հասցնեն այն կետին, որ բանակի անձնակազմն ըստ Էության կրճատվի։ Հիմա այն ծրագրերը, որոնց հղում է արվում և կառավարությունը ներկայացնում է որպես այս իրավիճակում փոփոխություն մտցնելու հնարավորություն, ես կարող եմ միանշանակ ասել, որ մինչև 2027թ. ոչ միայն այդ խնդիրը չեն լուծելու՝ ստեղծելով հնարավորություն, որ պարտադիր ծառայության ժամկետները կրճատվեն, այլև հիմնական խոցելությունը ևս չեն կրճատելու»,-ասաց նա։

Պատգամավորը նկատեց, որ նույնիսկ համալրման այսօրվա մակարդակը հասցված չէ այնպիսի կետի, որ հնարավորություն տա անգամ տեսական դաշտում 3-4 տարի հետ քննարկել պարտադիր ծառայության կրճատման հարցը։

«Սրանով իշխանությունը երկու նպատակ ունի։ Միգուցե սա ադրբեջանական նախապայմանի կատարումն է՝ ցույց տալու, որ ապառազմականացումը, որը ենթադրում է անձնակազմի կրճատում, ՀՀ իշխանությունը նախատեսել է 2027 թ․։ Եվ երկրորդը՝ սա ունի հստակ նախընտրական նկարագիր և, վստահ եմ, որ շահարկվելու է, նախընտրական փուլում փորձ է արվելու մարդկանց ընտրական վարքագծի վրա ազդել»,-ասաց նա։

ԿԱՅՔԻ ՀԻՆ ՏԱՐԲԵՐԱԿ

Լրահոս

ՏԵՍՆԵԼ ԱՎԵԼԻՆ

Փոխկապակցված նորություններ

Քաղաքականություն

ՏԵՍՆԵԼ ԱՎԵԼԻՆ