12:04:14 8°C
  • USD - 482.28 ֏
  • EUR - 568.13 ֏
  • RUB - 6.53 ֏
  • Գենդերային հիմքով բռնությունը և սեռական ոտնձգությունը խիստ դատապարտելի են․ Անահիտ Մանասյան

    19:54 5 Դեկտեմբեր 2023

    ՄԻՊ գրասենյակը հաղորդագրություն է տարածել, որում նշված է․

    «Այսօր՝ դեկտեմբերի 5-ին, անցկացվել է Մարդու իրավունքների պաշտպանին առընթեր կանանց իրավունքների հարցերով հասարակական խորհրդի նիստը՝ նվիրված «Ընդդեմ գենդերային բռնության ակտիվության 16-օրյակ» միջազգային քարոզարշավին:

    Ողջունելով ներկաներին՝ Մարդու իրավունքների պաշտպան Անահիտ Մանասյանը նշել է, որ այս միջոցառումը ևս մեկ առիթ է կանանց իրավունքների խթանման ու պաշտպանության կարևորությունն ընդգծելու ու այդ ուղղությամբ տարվող ջանքերը համատեղելու համար։

    Նա արձանագրել է, որ գենդերային հիմքով բռնությունը և ընտանիքում բռնությունը բռնության առանձնահատուկ տեսակներ են, հետևաբար՝ դրանց հասցեավորումն ու պայքարը ևս ենթադրում են առանձնահատուկ մեթոդաբանություն: Այս համատեքստում Պաշտպանը հատուկ ընդգծել է, որ անհրաժեշտ է լուրջ քայլեր ձեռնարկել ոչ խտրական և հանդուրժող միջավայր և հասարակություն ձևավորելու ուղղությամբ: 

    «Ցանկանում եմ հատուկ ընդգծել, որ Մարդու իրավունքների պաշտպանի աշխատակազմում կանանց նկատմամբ և ընտանիքում բռնության դեպքերի առնչությամբ բողոքներ մշտապես են ստացվում: 2023 թվականի հունվարից նոյեմբեր ընկած ժամանակահատվածում ՄԻՊ աշխատակազմում ստացվել է ընտանիքում բռնության վերաբերյալ 78 գրավոր և բանավոր դիմում-բողոք, որից 67-ի դեպքում բռնության են ենթարկվել իգական սեռի ներկայացուցիչները»,- բացման խոսքում ասել է Անահիտ Մանասյանը:

    Պաշտպանն իր խոսքում ընդգծել է, որ գենդերային հիմքով բռնության ցանկացած դրսևորում և սեռական ոտնձգություն խիստ դատապարտելի են։ Այս խնդիրների հասցեավորման ու լուծման գործում կարևորելով Խորհրդի դերը` Անահիտ Մանասյանը նշել է, որ այն յուրօրինակ կամուրջ է պետության և քաղաքացիական հասարակության միջև:

    Միջոցառմանը բացման խոսքով հանդես են եկել նաև ՀՀ-ում ԵՄ պատվիրակության ղեկավարի տեղակալ Յան Պլեշինգերը և ՄԱԿ-ի Բնակչության հիմնադրամի հայաստանյան գրասենյակի ղեկավար Ծովինար Հարությունյանը: Նրանք ևս կարևորել են Խորհրդի դերը կանանց իրավազորման, նրանց նկատմամբ բռնության և գենդերային բռնության կանխարգելման գործում։

    Նիստի շրջանակում անցկացվել են քննարկումներ՝ «Ընտանիքում բռնության դեմ պայքարում Հայաստանի Հանրապետությունում առկա իրավիճակը. արձանագրված խնդիրներն ու արդի մարտահրավերները» և «Սեռական ոտնձգությունն աշխատավայրում և ուսումնական հաստատություններում» թեմաներով: Մասնավորապես՝ նշվել են ընտանիքում բռնության և գենդերային հիմքով բռնության, սեռական ոտնձգության ենթարկված անձանց իրավունքների պաշտպանության մեխանիզմները, ոլորտային բացերն ու հասարակությունում առկա կարծրատիպերը, անդրադարձ է կատարվել միջազգային իրավական կառուցակարգերին ու կարգավորումներին: 

    Ամփոփելով միջոցառումը` Անահիտ Մանասյանը շնորհակալություն է հայտնել Խորհրդի անդամներին և միջոցառման մասնակիցներին ակտիվ մասնակցության համար՝ նախանշելով Խորհրդի հետագա գործունեության հիմնական ուղղություներն ու քայլերը։

    ՀՀ Մարդու իրավունքների պաշտպանին առնթեր կանանց իրավունքների հարցերով հասարակական խորհրդի նիստն իրականացվել է «Հաշվետու հաստատություններ և մարդու իրավունքների պաշտպանությունը Հայաստանում» ծրագրի շրջանակներում, որը ֆինանսավորվում է Եվրոպական միության կողմից և իրականացվում է ՄԱԶԾ-ի, ՅՈՒՆԻՍԵՖ-ի, ՄԱԿ-ի Բնակչության հիմնադրամի և ԵԱՀԿ-ի աջակցությամբ»։

     

    ԿԱՅՔԻ ՀԻՆ ՏԱՐԲԵՐԱԿ

    Լրահոս