«Դիմադրությունը պետք է լինի Արցախում, Սփյուռքում․ պետք է ողջ հայ ժողովուրդը համախմբվի»․ ընդդիմադիր պատգամավորներն Արցախում մի շարք հանդիպումներ են անցկացրել

21:49 23 Հունիս 2022

ՀՀ ԱԺ «Հայաստան» և «Պատիվ ունեմ» խմբակցության պատգամավորները հունիսի 21-23-ը եռօրյա այցով գտնվել են Արցախի Հանրապետությունում, հանդիպումներ ունեցել քաղաքական ուժերի, Արցախի Ազգային Ժողովի բոլոր խմբակցությունների, պետական կառույցների ներկայացուցիչների եւ Արցախի պաշտոնաթող նախագահների հետ, տեղեկացնում է News.am-ը։

ԱԺ փոխխոսնակ Իշխան Սաղաթելյանը նշել է, որ «Դիմադրություն» շարժման գլխավոր նպատակը դիմադրությունն է Հայաստանի արտաքին թշնամիներին, երկրի առջև եղած սպառնալիքներին։

«Բայց երբ պետությունն այդ դիմադրությունը չի կազմակերպում ու չի սպասարկում պետության ու ժողովրդի շահերը, հետեւաբար, այդ դիմադրությունը լինում է նաև ներքին օրակարգում։ Մենք Հայաստանում դրել ենք իշխանափոխության օրակարգ, և ամեն ինչ անելու ենք դրան հասնելու համար, որովհետև գտնում ենք, որ, դժբախտաբար, այս ամենի պատճառը Հայաստանի իշխանություններն են և նրանց վարած քաղաքականությունը։ Այդ դիմադրությունը պետք է լինի Արցախում, սփյուռքում, պետք է ողջ հայ ժողովուրդը այս գաղափարի շուրջ համախմբվի»,- ասել է նա։

ԱԺ «Պատիվ ունեմ» խմբակցության պատգամավոր Տիգրան Աբրահամյանը նշել է, որ Արցախում ապրող մարդկանց համար կարևոր երաշխիքներից մեկը պետք է դառնա Պաշտպանության բանակը՝ իր փոփոխություններով, իր վերակառուցողներով, ժամանակակից տեխնիկայով ապահովելու միջոցով

«Բայց քանի Հայաստանում այս իշխանությունն է, որէէ բան այս ուղղությամբ չի լինելու»,- ընդգծել է նա։

Քաղաքացիներից մեկի խոսքով՝ երբ «Դիմադրություն» շարժումը սկսել է իր պայքարը, իրենց մոտ մեծ ոգևորվածություն է առաջացել

«Ամեն անգամ, երբ Փաշինյանը ելույթ է ունենում, մենք արդեն սովորել ենք, որ մի վատ բան է լինելու»,- ասել է նա։

ԱԺ «Հայաստան» խմբակցության պատգամավոր Գեղամ Մանուկյանը նշել է, որ վերջին 1,5 տարվա ընթացքում Հայաստանի Հանրապետությունն Արցախի Հանրապետության հետ ունեցել է «խայտառակ հարաբերություններ»։

«Անցնող ամիսներին Արտաքին գործերի նախարարություններն իրար հետ ընդհանրապես կապ չունեն։ Այս շրջանում փորձ է արվում Արցախը ներկայացնել ոչ միասնական տեսքով, ոչ միասնական դիրքորոշմամբ, ոչ միասնական կեցվածքով»,- ասել է Մանուկյանը։

ԱԺ «Հայաստան» խմբակցության պատգամավոր Աղվան Վարդանյանի խոսքով՝ Հայաստանում շարժումը նոր թափ է հավաքել, երբ հարցը վերաբերել է Արցախին։

«Սրանք այնքան են լկիտացել, այնքան են կարողացել ստել, որ այսօր էլ հանգիստ կանգնում, ասում են՝ պահանջում են նշաձողն իջեցնել, Արցախը կարող է լինել Ադրբեջանի կազմում, մեզ համար ավելի կարևոր է Հայաստանը, քան Արցախը։ Իրականում նրանց համար ոչ մի բան կարևոր չի»,- ասել է Վարդանյանը։

ԱԺ «Հայաստան» խմբակցության պատգամավոր Արամ Վադևանյանն էլ նշել է, որ «Դիմադրություն» շարժման անդամներն իրենց գործողություններում վճռական են։

«Այս ընթացքում իրականացրել ենք տարբեր հավաքներ, ակցիաներ։ Այն, ինչը հնարավոր է, առավելագույնը կատարել ենք։ Հայաստանի Հանրապետության բնակչության ստվար զանգվածն աջակցություն է հայտնել այն ելակետերին, որը մենք առաջ ենք քաշել։ Եվ ելակետերից անկյունաքարայինն այն է, որ Արցախը երբեք չի կարող լինել Ադրբեջանի կազմում»,- շեշտել է Վարդևանյանը։

ԿԱՅՔԻ ՀԻՆ ՏԱՐԲԵՐԱԿ

Լրահոս

ՏԵՍՆԵԼ ԱՎԵԼԻՆ

«Դիմադրությունը պետք է լինի Արցախում, Սփյուռքում․ պետք է ողջ հայ ժողովուրդը համախմբվի»․ ընդդիմադիր պատգամավորներն Արցախում մի շարք հանդիպումներ են անցկացրել

Լրահոս

Փոխկապակցված նորություններ

Տնտեսություն

Հասարակություն