09:25:13 -4°C
  • USD - 482.28 ֏
  • EUR - 568.13 ֏
  • RUB - 6.53 ֏
  • Կնոջը խեղդամահ անելու մեջ մեղադրվող Նարեկ Սարգսյանի պաշտպանը պնդում է՝նրա բնակարանը լքելուց հետո կինը 2.5 ժամ կարող էր ողջ լինել

    22:15 8 Դեկտեմբեր 2022

    Իր կնոջը խեղդամահ անելու մեջ մեղադրվող Մրգավետ համայնքի ղեկավարի որդու՝ 35-ամյա Նարեկ Սարգսյանի, պաշտպանը պնդում է՝ Նարեկ Սարգսյանի կողմից բնակարանը լքելուց հետո կինը մոտ 2,5 ժամ կարող էր դեռ ողջ լինել։ Սա, ըստ նրա, հաստատվել է դատաբժշկական փորձաքննության եզրակացությամբ։

    Հիշեցնենք, որ մայիսի 5-ին Երևանի բնակարաններից մեկում հայտնաբերվել է 35-ամյա Տաթևիկ Աբրահամյանի դին՝ պարանոցի և դեմքի շրջանում բռնության հետքերով։ Վերջինս ոստիկանության Կոտայքի մարզային վարչության նախկին պետ, ոստիկանության գնդապետ Ավետիք Աբրահամյանի դուստրն էր, աշխատում էր ԵՊՀ-ում՝ որպես դասախոս։

    Քրեական վարույթի շրջանակներում ձերբակալվել, ապա՝ կալանավորվել է Տաթևիկի ամուսինը՝ Նարեկ Սարգսյանը։ Նրան մեղադրանք է առաջադրվել ՀՀ նախկին քրեական օրենսգրքի 104-րդ հոդվածի առաջին մասով՝ սպանության հատկանիշներով։ Նարեկ Սարգսյանը Մրգավետ համայնքի ղեկավարի որդին է, որն ըստ մեղադրանքի՝ խեղդամահ է արել կնոջը։

    Նարեկ Սարգսյանի պաշտպան Աննա Ծառուկյանը «Փաստինֆո»-ի հետ զրույցում հայտնեց, որ ստացվել է դատաբժշկական փորձաքննության եզրակացությունը, սակայն անհրաժեշտ է կրկնակի փորձաքննություն։ Փաստաբանը, զերծ մնալով մանրամասներ հայտնելուց, նշեց, որ իրենց կասկածները չեն փարատվել՝ բժշկական անփութության վերաբերյալ։

    «Միայն մեկ բան կասեմ՝ հիմնավոր կասկածն է նվազել»,- նշեց Ծառուկյանը՝ հավելելով, որ փորձագետի համաձայն՝ կինը կարող էր դեռ 2.5 ժամ կենդանի լինել՝ Նարեկ Սարգսյանի կողմից բնակարան ենթադրաբար մուտք գործելու և դուրս գալուց հետո. «Այսինքն, բժիշկների մուտք գործելու և դուրս գալուց հետո էլ դեռ 1-1.5 ժամ, իսկ Նարեկ Սարգսյանից հետո՝ 2-2.5 ժամ հետո կարող էր աղջիկը ողջ լինել։ Այդ մասը փորձաքննության եզրակացության առարկա չի դարձվել»։

    Փաստաբանը զերծ մնաց մանրամասնելուց, թե կոնկրետ երբ է արձանագրվել կնոջ մահը, միայն նշեց, որ մեղադրանքում նշված և փորձագետի կողմից արձանագրված ժամանակահատվածը չի համապատասխանում։

    «Նշված ժամանակահատվածը համընկնում է այն ժամանակահատվածի հետ, երբ բժիշկները կարող էին փրկել կնոջ կյանքը, բայց կասկածներ ունենք, որ բժշկական անփութության արդյունքում կյանքը փրկել չի հաջողվել»,- նշեց փաստաբանը։

    Պաշտպանը նաև տեղեկացրեց, որ միջնորդություն է ներկայացվել՝ Նարեկ Սարգսյանի նկատմամբ ընտրված խափանման միջոց կալանավորումը գրավով փոխարինելու մասին՝ գրավի չափ առաջարկելով 10 մլն ՀՀ դրամը, որը մերժվել է։ Դատարանի որոշման դեմ բողոք է ներկայացվել։

    ԿԱՅՔԻ ՀԻՆ ՏԱՐԲԵՐԱԿ

    Լրահոս

    Փոխկապակցված նորություններ