Նոր Զելանդիայում առաջարկել են ընտրողների տարիքն իջեցնել 16-ի

00:10 23 Նոյեմբեր 2022

Նոր Զելանդիայի իշխանություններն առաջարկել են մինչեւ 16-ի իջեցնել ընտրողների տարիքը։ Համապատասխան օրենսդրական նախաձեռնությունը վարչապետ Ջասինդա Արդերնը մտադիր է ներկայացնել խորհրդարանի առաջիկա քննարկմանը։

Ինչպես նշել է The Guardian-ը, այս գաղափարն առաջացել է այն բանից հետո, երբ գերագույն դատարանը պատմական որոշում է կայացրել այն մասին, որ գոյություն ունեցող 18-ամյա ցենզը խտրական է եւ խախտում է երիտասարդների իրավունքները։ Հարցի քննարկումը տեւել է երկու տարի։ Արդյունքում՝ դատարանը պաշտպանել է Make It 16 խմբի ակտիվիստների դիմումը, որոնք հավաստիացնում են, որ երիտասարդները պետք է քվեարկելու հնարավորություն ունենան, երբ ընդհանուր քննարկման են դրվում հարցեր, որոնք վերաբերում են, օրինակ, կլիմայի փոփոխությանը, քանի որ դրանք վերաբերում են ապագային, երբ պետք է ապրեն հենց երիտասարդները;

«Կառավարությունը եւ խորհրդարանը չեն կարող անտեսել այս հստակ իրավաբանական եւ բարոյական ուղերձը։ Նրանք պետք է թույլ տան մեզ քվեարկել»,- ասել են Make It 16-ում։

Արդերնի խոսքով՝ ինքն անձամբ կողմ է, որ տարիքն իջեցվի մինչեւ 16 տարեկանի, բայց հարցը պետք է լուծի խորհրդարանը։

Ընտրությունների մասին օրենքում փոփոխություներ կատարելու համար նախաձեռնությունը պետք է ստանա պատգամավորների 75 տոկոսից ոչ պակասի աջակցությունը։ Իսկ դա նշանակում է, որ առաջարկի համար պետք է քվեարկեն երկրում կառավարող լեյբորիստները եւ ընդդիմադիր Ազգային կուսակցության ներկայացուցիչները։ Բայց վերջինները դրա անհրաժեշտությունն առայժմ չեն տեսնում։ Նրանք կարծում են, որ ծանրակշիռ պատճառներ չկան տարիքն իջեցնելու համար, եւ որ շատ երկրներում ընտրելու իրավունք ունեն 18 տարեկանից։ Կառավարող լեյբորիստական կուսակցությունը դեռ դիրքորոշում չի հայտնել։ Բայց նախաձեռնությունը դուր է եկել «կանաչներին» եւ մաորի կուսակցությանը։

Make It 16-ը գործունեությունն սկսել է մի քանի տարի առաջ, երբ դեռահասներն ակտիվ մասնակցություն էին ունենում բողոքի ցույցերին կլիմայի փոփոխության դեմ։ Էկոլոգիայի հարցերը, սակայն, առաջին քայլն էին երիտասարդության իրավունքների պայքարում։ Շարժման ներկայացուցիչները պնդում են, որ երիտասարդները պետք է ձայնի իրավունք ունենան նաեւ այլ հարցերում՝ հանրային տրանսպորտի ֆինանսավորումից մինչեւ հոգեկան առողջություն։

Ներկայում միայն մի քանի երկրներում են թույլ տալիս քվեարկել 18-ից ցածր տարիքի երիտասարդներին։ Խոսքը Բրազիլիայի, Կուբայի, Ավստրիայի, Մալթայի մասին է։ Շոտլանդիայում 16 տարեկանները կարող են քվեարկել շրջանային խորհրդարանական ընտրություններում, բայց հանրային մակարդակում զրկված են նման հնարավորությունից Բրիտանիայում։

ԿԱՅՔԻ ՀԻՆ ՏԱՐԲԵՐԱԿ

Լրահոս

ՏԵՍՆԵԼ ԱՎԵԼԻՆ

Փոխկապակցված նորություններ

Տնտեսություն

ՏԵՍՆԵԼ ԱՎԵԼԻՆ

Հասարակություն

ՏԵՍՆԵԼ ԱՎԵԼԻՆ